Mäkelborg-Vörpommern hett ein niech Lannsbeupdrachte för Nedderdüütsch. Nadine Koop hett de Upgåf mit den Anfang von’t lopen Schauljohr œwernåhmen. De Schworpunkt von ehr Upgåwen is de Födderung un Plääch von dat Plattdüütsche bi de Billung. Båbentau is se noch för de Anliggen von’t Nedderdüütsche in MV in dat Land, bi den Bund un internatschonal taustännig.

Billungsministersche Simone Oldenburg: „För Nadine Koop is Platt wat, dat ehr an dat Hart liggen deit. Ik hœch mi, dat wi mit ehr ein angaschiert Mitarbeitersche wunnen hebben, de sik üm dat plattdüütsch Arf kümmern deit un junge Minschen för Platt begeistern mach. Mit uns Nedderdüütsch-Botschappersche Jette Bolz hett se ein starken Partnersche an ehr Siet. Tau den irsten Mål in de Geschicht vun dat Land hebben wi sogor ein eigen half Städ för de Lannsbeupdrachte inricht. Bet dorhen wier dat jüst ein Beschäftigung up Afordung. In Tieden mit ein sworen Hushaltslåch is dat keen Sülfstverstännichkeit nich un deit ünnerstrieken, wo wichtig uns de Plääch un de Födderung von dat Nedderdüütsche is.“ 

Nedderdüütsch Lannsbeupdrachte Nadine Koop: „Ik hoech mi bannig œwer de niegen Upgåwen un de Schangs, dat ik an de Taukunft vun’t Nedderdüütsche hier aktiv mitarbeiten kann. In de verläden Johren heff ik mit’t Nedderdüütschsekretariat/Bunnsraat för Nedderdüütsch ‘n plattdüütsch Jœchdarbeit upbuen künnt un mach Platt ok girn för junge Lüd in MV taugänglicher måken.“ 

Nadine Koop hett al in dat dfg-Projekt „Wossidlo-Teuchert online“ an de Wossidlo-Forschungsstäd von de Universität Rostock an de Digitalisierung von dat Mäkelbörgsche Wüürbauk mitmåkt, un harr ok dat Leitt von dat Projekt „Späldäl Rostock“, dör dat Nåwass för de Nedderdüütsche Amateur-Bühns wunnen warden sall. Se de al Nedderdüütsch ünnerrichten un angaschiert sik bi den Heimatverband MV e. V. un bi de Nedderdüütsche Bühn Rostock. Mit ehr Kinner schnackt se Platt. 

Bi den irsten Lannsfackdach Nedderdüütsch an den Dünnersdach, 6. November 2025, in dat Ostseebad Boltenhagen stellt sik de nie Lannsbeupdrachte apenlich vör. Bi de Veranstaltung, de ünner dat Motto „All tauhop“ steiht, hebben Liehrerslüd un pädagogsch Fackkräften de Gelägenheit, sik tau vernetten un uttautuuschen. 

Båbentau warrd bi den Lannsfackdach tau dat irste Mål dat „Nedderdüütsche Schäulerwuurt vun dat Johr“ 2025 ihrt. Bet tau den 10. Oktober 2025 künnen die 37 Schaulen, de Ünnerricht in dat Fack Nedderdüütsch anbeiden, ehr Vörschläch för dat nedderdüütsche Wuurt œwer dat lannswiede Lihrmanagementsystem „itslearning“ inlangen. In Mäkelborg-Vörpommern gifft dat 1.300 junge Lüd, de Plattdüütsch in de Schaul liehren. 

Up den Lannsfackdach warden ok Schaulen un Kitas, de al ein Nedderdüütsch-Anbott hebben, för ehr Angaschment utteknet. De Lannsfackdach finnt vun Klock 12 bet Klock halwig 5 in dat Wichernhus in dat Ostseebad Boltenhagen statt. He kricht von dat Kumpetenzzentrum för Nedderdüütschdidaktik von de Universität Gripswold tütt.